व्यवसायिक रूपमा सफल एवम समिक्षकको नजरमा समेत उत्कृष्ट ठहरिएको 'पशुपति प्रसाद'ले २०७२ सालको सर्वोत्कृष्ट चलचित्रतर्फको राष्ट्रिय पुरस्कार हात परेको छ।
बिहिबार चलचित्र बिकास बोर्डमा भएको बोर्ड स्थापना दिवस मनाउन आयोजित कार्यक्रममा सो घोषणा गरिएको हो।
सर्वोत्कृष्ट फिल्मसँगै 'पशुपति प्रसाद'ले लेखन र निर्देशनतर्फको पुरस्कार पनि आफ्नो पक्षमा पार्दै राष्ट्रिय चलचित्र पुरस्कारमा ह्याट्रिक गरेको छ। लेखनबाट 'खगेन्द्र लामिछाने र निर्देशनबाट दिपेन्द्र के खनालले उक्त पुरस्कार हात पारेका हुन्।
त्यस्तै सर्वोत्कृष्ट अभिनेतामा 'कबड्डी कबड्डी' फिल्मबाट दयाहाङ राई घोषित भएको छ भने अभिनेत्रीतर्फ 'क्लासिक' बाट नम्रता श्रेष्ठ उत्कृष्ट भएकी छन्।
यसैगरी छायाँकनमा 'ड्रिम्स'बाट सञ्जय लामा र पुरुषोत्तम प्रधानले पुरस्कार आफ्नो पक्षमा पारे। सम्पादन तर्फ 'क्लासिक' फिल्मबाट सुरेन्द्र पौडेल उत्कृष्ट कहलिएका छन् ।
आदिवासी जनजाती फिल्म तर्फ गुरुङ भाषाको फिल्म 'यम्फु देवराली' उत्कृष्ट बनेको छ भने जुरीले प्रदान गर्ने अधिकार पाएको विशेष पुरस्कारको हकदार नव निर्देशकमा भुवन केसी बनेका छन्।
यसैबीच लाईफटाईम एचिभमेन्ट पुरस्कार नेपालकी पहिलो अभिनेत्री बसुन्धरा भुषाललाई प्रदान गरिने भएको छ। भुषाललाई ३ लाख ५१ हजार र सम्मान पत्रले सम्मानित गरिने भएको हो।
बिहिबार साँझ ५ बजे राष्ट्रपति भवनमा आयोजना हुने विशेष कार्यक्रमका बीच विजेता फिल्मकर्मीलाई राष्ट्रपति विधादेवी भण्डारीको हातबाट पुरस्कार प्रदान गरिनेछ।
रमेश बुढाथोकी संयोजकत्वको लय संग्रौला, सरिता लामिछाने, मोहन निरौला, सुशिल पौडेल र करुण थापा सम्मिलित ६ सदस्यिय निर्णायक मण्डलले बर्ष २०७२ मा प्रदर्शन भएका फिल्मबाट उत्कृष्ट छनोट गरेको हो।
