काठमाडौ । साहित्यकार तथा सञ्चारकर्मी जितेन्द्र रसिकको चौथो कृति ‘काफिया’ गजल सङ्ग्रह र कवियत्री ऋद्धि लक्ष्मी कायस्थको कविता सङ्ग्रह ‘मौनता बोल्छ’ शुक्रवार राजधानीमा लोकार्पण गरिएको छ । भक्तपुर साहित्यसमाजद्धारा आयोजना गएिको कृति लोकार्पण कार्यक्रमका प्रमुख अतिथि ज्ञानुवाकर पौडेल, विशेष अतिथि गीत तथा गजलकार राजेन्द्र थापा, समाजसेवी कृष्णलाल प्रधान, गीतकार गोपीकृष्ण ढुङ्गाना लगायतले सामुहिक रूपमा कृतिको लोकार्पण गरिएको हो ।
कार्यक्रममा गीत÷गजलकार तथा आख्यानकार राजेन्द्र थापाले रसिकका सबै गजलहरु गेयात्मक रहेकाले गायनको लागि अति उपयुक्त गजल भएको बताउनु भयो । । उनले गजल पछिल्लो समय वाचनको लागि पनि लेखिने गरेको र त्यस्ता गजलहरु सशक्त हुँदै आएको चर्चा गरे । कार्यक्रममा महाकवि चन्द्र प्रसाद न्यौपानेले अमेरिका बस्दै आएकी कवियत्री ऋद्धी लक्ष्मी कायस्थका कविता सङ्ग्रह ‘मौनता बोल्छ’ कृति नामैले काफि भएको बताउनु भयो । कार्यक्रममा गीतकार तथा साहित्यकार गोपीकृष्ण ढुंगानाले काफिया गजल सङ्ग्रह जीवन र जगतको लागि भएको बताउनु भयो । कार्यक्रममा सभापति तथा भक्तपुर साहित्यिक समाजका अध्यक्ष राजुराम मुनकर्मीले काफिया गजल सङ्ग्रह सिक्न चाहने र आधारभूत गजल सिद्धान्त जान्न चाहनेको लागि उपयुक्त कृति रहेको बताउनु भयो । उहाँले संविधानमा नेपाली साहित्य र स्रष्टा सर्जकलाई प्रत्याभूती गर्न नसकेको बताउनु भयो ।
‘काफिया’ गजल सङ्ग्रह १ सय ३२ पृष्ठमा सङ्ग्रहित छ । डिजिटल प्रिन्टलिंक भक्तपुरले प्रकाशित गरेको यो कृतिको मूल्य एक सय पचास रुपैयाँ रहेको छ । त्यस्तै ‘मौनता बोल्छ’ कविता सङ्ग्रह दिलिपराजा कायस्थले प्रकाशन गरेको हो । यो कृति १ सय पृष्ठमा ५२ कविता अटाएका छन् भने मूल्य एक सय पचास रुपैयाँ रहेको छ । गजलकार रसिकको यस अघि तीन कृतिहरु क्रमशः हृदयस्पर्शी छालहरु (गजल सङ्ग्रह–२०६३), तारापुञ्ज (फाँचल सङ्ग्रह २०६५) एलियनको पृथ्वी भ्रमण (बालकथा सङ्ग्रह–२०७२) प्रकाशित छन् भने १६ वर्षदेखि कर्मको रूपमा सञ्चार क्षेत्रमा कार्यरत रसिक हाल सगरमाथा टेलिभिजनको समाचार शाखामा कार्यरत छन् ।
