साउन १ गते २९ औं वर्षमा प्रवेश गर्न लागेकी अभिनेत्री ऋचा शर्माले सिन्धुपाल्चोकमा नमुना एकिकृत नमुना बस्ती निर्माण गरिरहेका धुर्मुस–सुन्तलीलाई एक लाख रुपैयाँ सहयोग गरेकी छिन्। जन्मदिनको अघिल्लो दिन उनले धुर्मुससुन्तली फाउन्डेसनकी कोषाध्यक्ष कुञ्जना घिमिरे ‘सुन्तली’लाई एक लाखको चेक हस्तान्तरण गरिन्।
‘धुर्मुस–सुन्तलीले एकदमै राम्रो काम गरिरहनु भएको छ,’ ऋचाले सेतोपाटीसँग भनिन्, ‘पोहोर सालको जन्मदिनमा म नेपालमा थिइनँ त्यसैले सामान्य तरिकाले मनाएँ। यस वर्ष उहाँहरुलाई सहयोग गर्नु नै मेरो ‘बर्थडे सेलिब्रेसन’ हो।’ यद्यपि, शनिबार घरमा रुद्री पुजा लगाएर उनले जन्मदिन मनाउने छिन्।
सहयोग गर्न जाँदा धुर्मुससुन्तलीलाई सुरुमा त पत्यार नलागेको ऋचाले बताइन्। उनले भनिन्, ‘मैले कसैको सहयोग हस्तान्तरण गर्न लागेको सोच्नुभएको रहेछ। पछि आफ्नै सहयोग भन्ने थाहा भएपछि अचम्मित हुनुभयो।’
